Tàtari, pro sas Pascas de Nadale
su tzentru istòricu torrat a bida

di Salvatore Taras
Sunt medas sos acadessimentos chi isetant sos tataresos in custas dies de festividades, in sa chierca de torrare a fàghere pulsare su coro de sa tzitade. In s'ex mercadu tzivicu, est istadu ammaniadu su Fràile de su Mercadu, cun sas bancareddas, sos màndigos, sos produtos artigianales de Expo Tàtari.
Ma no est finida inoghe. In custu locale istòricu, sa gente at a pòdere agatare apuntamentos de dantza, cuntzertos e mùsicas. Su fine, narant sos organizadores Carlo Colombino e Checco Cadoni in rapresentàntzia de totu sos Assòtzios, est de fàghere a manera chi custos logos importantes pro sa tzitade potzant torrare a vida, comente unu tempus.
A pagu tretu, in su Palatzu de sa Frumentària, sas rapresentantes de s'Assòtziu "Nonunamacinque", in custos fines de chida sunt ammaniende "Piccoli chef e la magia del Natale", pro sos pitzinnos. Ant giai fatu sa domo de Babbu Nadale e su presepe durche, cun su panetone e sa pasta de tzucaru. Restat petzi sa cartzeta de sa Befana.
S'ispera est chi gràtzias a custas ideas bonas, su tzentru de Tàtari potzat èssere torradu a connòschere e a èssere frecuentadu.
A totu sos letores de "Sas Novas" andant sos mègius augùrios pro bonas Pascas de Nadale.


"Progetu realizadu cun sa partetzipatzione de sa Regione Autonoma de Sardigna - L.R. 26/97 subra sa limba
© Riproduzione non consentita senza l'autorizzazione della redazione

Leggi anche

Golfo Aranci